Празникот Павловден прославен во Горна Бањица

Денешниот празник Павловден, во гостиварска Горна Бањица беше прославен со црковно-народен собир. Црквата „Св. Петар и Павле“ традиционално секоја година на денешен датум ги собира православните верници од Гостивар и гостиварско на заедничко чествување. За Црковниот одбор, Павловден е голем и значаен настан на чија организација членовите целосно се посветуваат.

„На овој ден секој добронамерен човек овде е добро примен, нас не радува што секоја година традицијата се одржува и се собираат верници.“, рече Анѓеле Божиновски, член на Црковниот одбор на црквата „Св. Петар и Павле“ во Горна Бањица.

Во храмот утрово најпрво беше отслужена света литургија, а потоа се изврши чинот на осветување и режење на славската погача. Прославата заврши со заедничка трпеза за сите верници што ја посетија црквата и беа дел од празникот.

Трудејќи се да ја задржи традицијата и да го направи местото подостапно, побезбедно и попријатно за граѓаните, Црковниот одбор постојано работи на одржување и обнова на црквата и околното место. Изминатиот период беше изградена заштитна ограда, а поставена е и камбанарија.