Приведена и задржана во ПС Гостивар мајката на детето кое настрада во пожарот

Мајката на 7 годишното дете кое утрово настрада во пожар во Гостивар е лишена од слобода и задржана во полициска станица, поради основи на сомнение дека сторила кривично дело казниво по член 203, став 2 од Кривичниот законик „повреда на семејни обврски“, информираше полицијата.

Се очекува 35 годишната С.Т. од Ресен во текот на утрешниот ден да биде изведена пред судија на претходна постапка во гостиварскиот Основен суд.

Како што претходно информиравме пожарот се случи утрово во стан на трети кат во зграда на ул „Кеј Вардар“. Пожарникарите го извлекле детето од пламените јазици во бессзнание, а лекарска екипа констатирала смрт.

Обвинителството соопшти дека првичните сознанија на лекарскиот тим на лице место упатуваат на тоа дека детето за време на пожарот било врзано со ланец на нозете. Според исказот на семејството, причина за врзувањето било што детето било агресивно. Обвинителството извести дека ги презема сите дејствија за утврдување на евентуална кривична одговорност.“