Први Мај – Синдикатите со марш, граѓаните со скара

Меѓународниот Ден на трудот, Први Мај секоја година ги актуелизира истите прашања: Каква е положбата на работниците, колку е ценет и платен нивниот труд и секако „најважното“, каде ќе се прави првомајскиот излет?

Сојузот на синдикати на Македонија, Ден на трудот ќе го одбележи со синдикален марш во Скопје под мотото „Патиштата се различни, целта е една“. Во нивниот Првомајски проглас стои дека заложбите на Синдикатот се во насока на: подобрување на економската положба на работниците, сигурни работни места, повисоки плати, намалување на сиромаштијата, регрес за годишен одмор за сите вработени и друго.

Протестен марш по повод 1-ви Мај најави и Конфедерацијата на синдикати која се залага за промени во Законот за работни односи и против работата на извршителите. Оваа синдикална организација своите барања денес ќе ги достави до Владата.

Граѓаните во најголем дел и оваа година ќе останат верни на традицијата, да го поминат денот на излет со скара. Дали е тоа еден вид бегство од реалноста, или едноставно користење на слободниот ден за опуштање и уживање? Секој има свој одговор, но едно е сигурно, месото е подготвено и излетничките места ќе бидат полни и оваа година.