Работилница за превенција на рак на дојка во Гостивар, навременото откривање спасува живот!

Редовни прегледи и самоконтроли за да се превенира карциномот на дојка, порачаа присутните на работилницата којашто се одржа вечерва во Гостивар под мотото „Розов октомври“, а со цел сензибилизација за рак на дојка. Настанот го организираше Одделението за социјална, здравствена и детска заштита на Oпштина Гостивар во соработка со Здружението на пациенти „Езра“.

„Во месецот на борба против канцер на дојка традиционално организираме трибини и работилници со цел подигнување на свеста за превенција и поголема информираност на жените за болеста, значењето од рано откривање и третман“, рече Имерлие Салиу од општинското одделение.

Градоначалникот Арбен Таравари истакна дека општината секогаш дава поддршка на ваквите активности, со оглед дека се работи за заштита на здравјето.

„Во здравството велиме „Подобро да се спречи, отколку да се лечи“ и затоа е важно да се подигне свеста кај жените за превенцијата“, кажа тој.

Министерот за здравство Изет Меџити посочи дека во здравствениот систем се вметнуваат новини за добробит на пациентите.

„Превенцијата спасува живот. Овој месец почна примената на новиот протокол на упатување на жените за прегледи на дојка што го изготви Националната комисија за рана детекција и следење на рак на дојка во соработка со Мој термин. Целта е рано откривање на рак на дојка, навремено почнување со соодветна терапија, затоа што ова заболување може успешно да се излекува доколку навреме се открие“, рече министерот.

Во стручниот дел од работилницата пред присутните зборуваа радиологот Миранда Рамани Изаири, торакалниот хирург Илир Вела и онкологот Илир Исмаили.