Рурална женска мартовска кампања „ОД ЖЕНА ЗА ЖЕНА!“

Ова се резултатите од последното истражување кое што го реализираше Рурална Коалиција во периодот јануари-март 2021 година со фокус на програмите и мерките за финансиска поддршка во земјоделството и руралниот развој, но разгледувани од аспект на родова сензитивност и колку истите ги адресираат потребите на мажите и жените во секторот.

„Кога говориме конкретно за Полошкиот регион каде што се наоѓаме денес, најголемиот дел од жените не слушнале за мерката 115 која што е исклучиво наменета за поддршка и економско јакнење на жените, а има жени кои што се регистрирани како индивидуални земјоделки“, велат од Рурална коалиција.

Бидејќи и понатаму жените остануваат невидливи и се дел од неформалната економија, па не се препознаени ниту од системот ниту од државата, Рурална Коалиција во соработка со партнерските организации „Вредни Росомански Раце“, од Росоман и „Радика-Де“, од Дебар организираат промотивна кампања насловена „Од жена за жена“, а по повод март, месецот на родова рамноправност.

„Со оваа кампања сакаме да испратиме силна порака од жените од руралните средини за нивната потреба од економско зајакнување во услови на пост-Ковид ситуација. Но, не само тогаш. Ако ние го имаме квалитетот, го имаме домашното производство, ја имаме храната произведена и преработена со рацете на овие жени, па тогаш нели е тоа доволно за да станат ВИДЛИВИ, но во исто време и економски СИЛНИ? Има многу мерки како да се направи тоа, а ние решивме да почнеме од самите себе, односно купуваме, подаруваме, промовираме производи кои што самите жени ги произвеле. Кампањата ќе се случува во периодот од 08 до 12 март 2021 година во сите осум плански региони. На тој начин, традиционалните производи од волна од реканскиот и дебарски крај ќе завршат во Струмица или во источниот дел на државата, а традиционалните росомански слатка, во краевите каде што за прв пат ќе може да ги вкусат надалеку познатите „речели“ или слаткото од диви капини и шумски плодови. Жените едни на други ќе си подаруваат, ама и ќе се запознаваат со традицијата на жените од другите региони. Преку лепењето на постери, делењето на флаери, како и одржувањето на денешните разговори со жени лидерки од руралните средини ќе ја запознаеме пошироката јавност на локално ниво со традиционалните производи, со резултатите од истражувањето, со предизвиците со кои што секојдневно се соочуваат, но и ќе ја пренесеме пораката дека родовата еднаквост, рамноправност и економска моќ на жената ни е потребна повеќе од било кога претходно. На сограѓаните во Гостивар, Тумчевиште и Врапчиште ќе им поделиме маски како потсетник дека и понатаму треба да останеме безбедни и да се грижиме за нашето здравје и за здравјето на тие околу нас. Нека ваквата мартовска кампања биде посетник за сите нас дека жените од руралните средини се клучот за одржливоста на руралните средини и дека поддршката на секој од нас за нив е важна. Тоа е и единствениот пат како да се излезе од сенката на невидливоста! Придружете ни се затоа што нашето мото е дека само ЗДРУЖЕНИ МОЖЕМЕ ПОВЕЌЕ!“, вели Лилјана Јоноска, извршна дирекротка на Рурална коалиција.

Годишниот план за работа на Рурална Коалиција е поддржан од Цивика мобилитас.

Цивика мобилитас е програма на Швајцарската агенција за развој и соработка (СДЦ) за поддршка на граѓанското општество во Македонија, која ја спроведуваат НИРАС од Данска, Македонскиот центар за меѓународна соработка (МЦМС) и ФЦГ од Шведска

Повеќе информации за кампањата и активностите на Рурална коалиција можете да добиете на телефон 078/303-735 или на е-маил rkoalicija@gmail.com

(комерцијална објава)