Се потсетуваме на сериите кои ги полудеа Тв екраните во 90-тите години

Во денешно време е лесно да ја најдеш и погледнеш најновата епизода од омилената Тв серија, веднаш штом го доживее премиерното прикажување. Но, се сеќавате ли на времињата кога постоеше само еден Тв канал и мораше да се чека цела недела во определен термин за нова епизода. Ако се пропушти, втора шанса беше само репризата. Нема снимање, нема спуштање од интернет, нема онлајн гледање. Возбудата беше поинаква и токму затоа вреди да се потсетиме на неколку Тв серии што ги одбележаа тие времиња, деведесеттите години.

Беверли Хилс – првата тинејџ сапуница која го раскажуваше секојдневието на богатите средношколци во Беверли Хилс и доселените близнаци Бренда и Брендон Волш од Минесота. Сигурно се сеќавате на нивните ликови како и на другарите: Кели, Дона, Дилан, Стив…Серијата се прикажуваше успешно од 1990 до 2000 година.

Пријатели – Оваа комедија има армија на обожаватели низ целиот свет и останува популарна и денес. Првата епизода е прикажана на 22 септември, а последната  на 6 мај 2004 година. Серијата со неповторливите Рејчел, Џои, Фиби, Моника, Рос и Џендлер доживеа 10 сезони или вкупно 236 епизоди.

Твин Пикс – легендарна Тв серија создадена од Дејвид Линч и Марк Фрост која е исполнета со мистерии почнувајќи од убиството на убавата средношколка Лора Палмер. Главнот лик е ФБИ агентот Дејл Купер, а дејството се одвива во измислен град во Америка.

Итна служба или оригинално ER – Оваа серија може да се прогласи за мајка на „докторските“ серии. Раскажува за случките на итната служба во градска болница во Чикаго. Доживеа дури 15 сезони со снимени и емитувани 331 епизода. Голема заслуга за популарноста на серијата паѓа на холивудскиот шармер Џорџ Клуни како доктор Рос. Секако балканот го памети и хрватот Горан Вишнич во улогата на докторот Лука Ковач.

Тропски горештини – Канадска акциона серија со главниот јунак Ник Слотер, приватен детектив, кој во секоја епизода решава најразлични случаи на убиства, кражби, измами. Освен детективот заводник со шарените кошули, од оваа серија ја паметиме и неговата помошничка Силви Жерард.