СОНК: Додека вирусот беснее, некои директори ги повикуваат наставниците на работа без соодветен план и заштита

Синдикатот за образование, наука и култура вечерва се огласи во врска со враќањето на просветните работници во училиштата поради вршење на административните работи.СОНК предлага ваквите обврски, наставниците да ги завршуваат после 10 јуни, распоредени во помали групи заради нивна заштита.

„Во период на беснеење на смртоносниот вирус и ден со најголем број починати и заразени, некои директори на училишта ги повикуваат наставниците на работа, и тоа сите, без посебен план на активности и сериозна причина за ставање во ризик вработените од зараза. Ги предупредуваме таквите директори дека ја преземаат сета одговорност врз себе за последиците од евентуалните можни заразени вработени, заради необезбедени заштитни средства и социјална дистанца. Работните обврски кои ги имаат наставниците во однос на пополнување на педагошка администрација, предлагаме да биде после 10 јуни, освен за завршните одделенија, и тоа по распоред на активности во помали групи.
Наставничките совети да се одржуваат користејќи ги социјалните платформи кои и досега беа користени. Толкувањето на владината Уредба од 57 седница со која се укинува работата од дома за училиштата не важи, од причина што учебната година трае до 10 јуни и се изведува on line од дома. Сите постапки на директорите на училиштата кои се во спротивност со актуелните Закони и Уредби и преставуваат опасност по здравјето на вработените, благовремено да ги пријавите до претставниците на СОНК како и надлежните институции.“, се наведува во реакцијата на СОНК, која е објавена на официјалната фејсбук страница на сидикатот.