Советникот Салиу од ДСР на прес образложи зошто побарал повлекување на Акцискиот план за Ромите во Гостивар

„Не сум против донесувањето на Акцискиот план за Ромите, напротив, но сметам дека тој треба да се ажурира и во него да влезат проектите предложени од локалната група која десет години наназад работеше на креирање на акциски планови за ромските прашања. Тоа е причината поради која побарав акцискиот план да се повлече од дневен ред на седницата на Советот во понеделник. Претходно јас лично се консултирав со Комисијата, точката да помине и да дојде на дневен ред, но акцискиот план го добив дури откако помина на комисија. Тогаш се консултирав со локалната група, тие ми кажаа дека добар дел од приоритетите коишто тие ги донеле како група и жители Роми на Гостивар не се ставени во предложениот Акциски план и побараа од мене како Советник оваа точка да се повлече со цел групата заедно со предлагачот да го ажурира и прошири и како таков севкупно да го изгласаме“, рече Кашмир Салиу, советник од Демократски сили на Ромите кој денес свика прес конференција за да ги образложи причините зошто побара да се повлече Акцискиот план за Ромите од дневен ред на седницата во понеделникот.

Тој нагласи дека неговата изјава дадена на денот на седницата, од одредени поединци била извадена од контекст со политичка позадина и дека ја поздравува вољата на градоначалникот Таравари за решавање на приоритетните проблеми за ромската популација во Гостивар. „Најавувам дека Акцискиот план може да го донесеме без никаков проблем на наредна седница откако ќе се направи координирање со групата од страна на општината“, изјави Салиу.