Советот на млади на Гостивар годинава со триесетина настани и активности

Четвртата година од своето постоење, Советот на млади на Гостивар ќе ја исполни со настани и манифестации од разни области, во кои ќе биде вклучена младата популација од гостиварското подрачје. Програмата за работа на ова тело за 2017-та беше усвоена на последната седница на општинскиот Совет и таа предвидува триесетина активности. Преку нив се цели на промовирање на млади таленти, зближување на младите од различни етнички заедници, едукација за одредени проблеми и друго.

„Како поважни цели би ги издвоила едукација на младите за проблеми со кои се соочуваат, негување и развој на добри меѓуетнички односи, поддршка и промоција на таленти, јакнење на свеста за демократските вредости како создавање услови за практично искуство на студентите и младите луѓе“, информира потпретседателот на Советот на млади на Гостивар, Симона Лазарова.

Програмата содржи организирање на Олимпијада на народни игри, кошаркарски и шаховски турнири, одбележување на Ден на здравјето, Ден за борба против СИДА, промоција на книги, кино проекции во летниот амфитеатар, уметничка колонија како и редовната Недела на млади која се спроведува во есенските месеци.

Програмата на Советот на млади се финансира со средства од општинскиот буџет на Гостивар. Годинава за оваа намена се издвоени еден и пол милиони денари.