Советот за етика во медиумите во Гостивар: Саморегулацијата е најдобар начин да се заштити новинарската професија

Советот за етика во медиумите денес организираше Отворен ден во Гостивар со јавна седница на комисијата за жалби. Целта на ваквите активности е јавноста и медиумите одблиску да се запознаат со работата на Комисијата, граѓаните да се поттикнат да реагираат на неетичко и непрофесионално новинарство, како и да се промовира слободата на работа на медиумите.

„Саморегулацијата е најдобар начин да се заштити новинарската професија, саморегулацијата е унапредување на тековната работа на медиумите низ подигнување на стандардите. Не само што треба да постои свесност за стандардите во новинарската професија, туку тие стандарди треба постојано да се надградуваат, бидејќи праксата носи различни примери и околности коишто бараат да се биде етичен“, рече Марина Тунева, извршен директор на Советот за етика во медиумите

Анализите на Советот покажале дека најчеста појава при прекршување на кодексот е едностраното информирање, потоа следуваат мешање на факти со мислење и ставови на новинарите и говорот на омраза и дискриминација по различни основи.

Комисијата за жалби при Советот за етика во медиумите е формирана пред четири години и до сега има донесено 290 одлуки.