„Сурфај, но внимателно споделувај“ – полицијата ќе им држи часови на ученици во Гостивар и Тетово

Секторот за внатрешни работи Тетово од денес започна со реализација на превентивно-едукативниот проект со наслов „Сурфај, но внимателно споделувај“, чија главна цел е учениците да се заштитат од можни злоупотреби на социјалните мрежи.

Со проектот вкупно ќе бидат опфатени околу 3.500 седмоодделенци од 92 основни училишта на тетовско-гостиварското подрачје, кои следат настава на македонски, албански и на турски јазик.

Од СВР информираат дека стручно обучени полициски службеници, на посебни часови ќе им објаснуваат на учениците како и на што треба да внимаваат кога споделуваат лични податоци и фотографии на социјалните мрежи, односно како најефикасно да се заштитат од злоупотреби на нивните податоци, фотографии или снимени видео-клипови.

Учениците, исто така, поблиску ќе бидат запознати и со законските последици доколку тие  случајно или намерно злоупотребуваат лични податоци на други лица.

Носител на проектот е Отсекот за превенција, во соработка со локалните самоуправи. Планирано е проектот целосно да заврши до крајот  на идниот месец.