Свечен чин на молитва за татковината во Бигорскиот манастир

Во манастирот Свети Јован Бигорски, вчера во рамки на Илинденските чествувања беше извршен и свечен чин на Доксологија – молитва за покој на душите на паднатите борци и молитва за татковината.

„Заради подвизите и молитвите на нашите светии, на просветителите и преродбениците, на народните херои и великани на духот, кои многу добро знаеле што биле, за што се бореле и за што се жртвувале, да стоиме и ние цврсто во слободата со која нѐ ослободи Христос, за да не ја изгубиме и политичката слобода. Господ да нѐ чува во таа преслатка слобод, а Христова, да ни ја чува Татковината, да ги просветлува оние на кои им е дадена власт да нѐ водат и како што прочитавме во молитвата, да им каже „добри зборови во срцата нивни за Црквата и за целиот Негов народ“. Одговорноста на оние што имаат раководни места е голема и треба не само да ги критикуваме, туку да се молиме за нив. Од своја страна и тие треба да бидат свесни за положбата што ја имаат, бидејќи оној кој добил призив да води народ, било во Црквата или во државата, тој треба да биде, пред сѐ, слуга.“, рече во своето обраќање пред присутните, игуменот на Бигорски, Архимандрит Партениј.