Свечена промоција на матурантите во средното техничко училиште во Гостивар

Средното техничко училиште во Гостивар денес организираше свечена церемонија на која беше промовирана новата генерација матуранти. Свеченоста се одржа во дворот на училиштето, каде беа промовирани 155-те ученици кои годинава излегуваат со димплома за завршено средно од овој образовен центар на трите наставни јазици: македонски, албански и на турски.

„Драги матуранти, почитувани родители и професори без кои не можеше да се реализира успешно онлајн наставата, ви благодариме што бевте упорни овие матуранти и покрај ковид 19 да ја завршат учебната година, така како што треба. Знам дека ние ќе продолжиме да се гордееме со нашите ученици и понатаму, им посакувам најголеми успеси“, рече Аслијан Снопче, раководителка на општинскиот Сектор за образование.

Честитки и желби за натамошен успех на матурантите им посака и директорот на училиштето Бесир Салиу.

„Имам голема чест денес и се гордеам со вас и она што го постигнавте. Ви посакувам здравје и успеси во вашите кариери и во иднина“, рече Салиу.

Свои кратки обраќања пред присутните имаа и замениците директори на училиштето.

На свеченоста беа прогласени учениците на генерацијата. Годинава оваа титула им припадна на Мирјана Петреска од македонските паралелки, Семира Елези од албанските и Ариф Скендеровски од паралелките на турски јазик. Пофалници им беа доделени и  на други матуранти од секој смер, кои постигнале добри резултати во текот на образованието.

Атмосферата беше надополнета со торта со симболична матурска  декорација, која ја пресекоа учениците на генерацијата, а свеченоста традиционално се заокружи со фрлање на капите.