Threads, ривалот на Твитер, привлекува корисници со неверојатна брзина

Threads, ривалот на Мета на Твитер, привлекува корисници со неверојатна брзина, собирајќи 10 милиони регистрирани за само седум часа, според ко-основачот и извршен директор Марк Зукерберг. Но, долгоочекуваната нова услуга, која бара профил на Инстаграм за да се вклучи, содржи контроверзна одредба: бришењето на профилот на Threads бара бришење на поврзаната сметка на Инстаграм!

Во „Дополнителна политика за приватност“, Мета објаснува: „Можете да го деактивирате вашиот профил на Threads во секое време, но вашиот профил на Threads може да се избрише само со бришење на вашиот профил на Instagram“.

Threads, апликација за разговор базирана на текст е алтернатива од висок профил на платформата за социјални медиуми Твитер во сопственост на Илон Маск.

Инстаграм, популарната платформа за споделување фотографии со повеќе од 2 милијарди корисници, во средата ја објави оваа апликација за корисниците во повеќе од 100 земји. Апликацијата, најновата во низата брзорастечки ривали на Твитер, се чини дека е најпосакуваната досега.

Во објава на Threads, Зукерберг ја објасни визијата што ја има за новата апликација: „Мислам дека треба да има јавна апликација за разговор со преку милијарда луѓе на неа. Твитер имаше шанса да го направи ова, но не успеа. Се надевам дека ние тоа ќе го направиме“.

Зукерберг има изјавено дека апликацијата привлекла 10 милиони регистрирани за само седум часа, споделувајќи емотикони што укажуваат на тоа дека бил презадоволен од приемот. Брзината до 10 милиони ја прави Threads најбрзо растечката апликација за потрошувачите.

Голем број брендови, вклучително Netflix, Amazon, Pepsi, исто така, ја покажаа својата доверба во Threads со регистрирање на апликацијата. Сепак, многу големи имиња се уште ги немaат направено своите профили на Threads.