Триесетина кривични дела од малолетници во Гостивар – Крадат, се тепаат и злоупотребуваат податоци на фејсбук

На гостиварското подрачје минатата година биле евидентирани 31 кривично дело од областа на малолетничката деликвенција.

Анализите на СВР Тетово покажуваат дека меѓу сторителите значителен број се  повторници, кои по неколку пати учествувале во извршување, најмногу на тешки кражби и кражби, неретко ангажирани и инструирани од повозрасни лица, кои биле нивни инспиратори и логистика при извршувањето на делата.

„Претежно станува збор за кражби во продавници, одземање на патнички возила, потоа кривични дела од безбедноста во сообраќајот, насилства, учество во тепачки и во последно време – злоупотреба на лични податоци преку социјалните мрежи, особено Фејсбук и Инстаграм. Овие злоупотреби, се честа појава во полошкиот регион,  од малолетници, меѓутоа и од повозрасни лица, кои по воспоставувањето контакт, најчесто со женски лица, на најразлични начини ги уценуваат, откако претходно ќе обезбедат нивни контраверзни фотографии или други видео материјали“, се наведува во полициското соопштение.

Минатогодишните дела од областа на малолетничката деликвенција во Гостивар биле заокружени со 17 кривични пријави.

Слична е состојбата и во тетовскиот регион, каде лани биле регистрирани 33 кривични дела од малолетничката деликвенција.