Умерено со празничното јадење и пиење за да немате маки!

На домашните кифлички, руската салата, сармите, десертите со кои изобилува празничната трпеза навистина е тешко да се одолее. Но за доброто на нашето здравје, мора да имаме мерка. Лекарите советуваат за време на празничните денови кога искушението е големо да се внимава колку и што се јаде и секако колку се конзумира алкохол. Преголемо количество храна, мрсни јадења и специјалитети налеани со алкохолни пијалоци се шок за организмот. За да одржите стабилност, не смеете да претерувате со ништо, предупредуваат лекарите поучени од искуствата дека најголемите проблеми од таков тип се јавуваат за време на празниците.

Ако се храниме умерено ќе избегнеме непосредни здравствени тегоби, како што се чувство на надуеност, или болки во стомакот, но и долготрајни последици како покачување на крвниот притисок и проблеми со варењето кое големиот внес на храна дополнително го отежнува.

Ако сепак се прејадете, следните совети може во извесна мера да ви бидат од помош: Изедете малку ананас, испијте чаша јогурт или ќефир. Овие намирници го подобруваат варењето на храната и ви ги олеснат маките. Добро дејство во тој правец имаат и одредени чаеви. Филџан зелен чај за време или после јадење ќе помогне вашето тело да се ослободи од акумулираните масти и холестарол. Чајот од пелин е одличен пријател на здравиот желудник.

Што се однесува до алкохолот, препораките на лекарите се една до две чашки жесток алкохол, или две до три чашки ако се пие вино или пиво. На конзумирањето алкохол посебно внимателни мора да бидат младите кај кои и мала количина пиење може да предизвика проблеми.