Утрово 169 верници од гостиварско тргнаа на аџилак

На аџилак од гостиварскиот регион годинава заминаа 169 муслимански верници, меѓу кои имаа и доста жени. Аџиите од Гостивар тргнаа утрово, по церемонијата за испраќање којашто се одржа во Медресето.
Од Гостивар до скопскиот аеродром патуваат со автобус, од каде патувањето до Саудиска Арабија го продолжуваат авионски.
Поклонувањето во Мека е еден од петте столбови на исламот и секој верник треба да го изврши барем еднаш во животот, доколку има средства и можности. Аџилакот започнува во Мека, пред верниците да продолжат кон долината Мина, на неколку километри на исток, каде е поставен голем град под шатори. Главен момент е поклонување со молитви на ридот Арафат.
Аџилакот се крунисува со муслиманскиот празник Курбан Бајрам, кој годинава се паѓа на 11 август.