Вкупно 7,2 милиони денари за спортисти, клубови, спортски настани во Гостивар – Како ќе се дели колачот?

Средства од вкупно 7,2 милиони денари се предвидени во Програмата за поддршка на спортот на општина Гостивар за 2019-та година. Парите се планирани за спортисти и клубови кои постигнуваат добри резултати и го промовираат Гостивар на полето на спортот. Кој колку пари може да добие, зависи од рангот на натпреварување и успесите.

Во Програмата е наведено дека минималниот износ за физички лица е 10.000 денари, додека максималниот 60.000 денари. Финансиската помош за спортските клубови се движи од  15.000 до 150.000, при поединечна исплата.

Во склоп на овие износи, дефинирани се неколку категории:

 Од 10.000 до 30.000 денари – поединци кои учествуваат на натпревари од локално и регионално ниво

Од 30.001 до 60.000 денари – поединци кои учествуваат на натпревари од национално и меѓународно ниво

Од 15.001 до 60.000 денари – спортски клубови кои учествуваат во општинаска лига

Од 60.001 до 100.000 денари спортски клубови кои учествуваат во регионална лига

Од 100.001 до 150.000 денари спортски клубови кои учествуваат во национална лига

Во исклучителни случаеви, кога спортскиот клуб се наоѓа во тешка финансиска состојба или има амбиција да напредува кон нагорна линија, Советот има иправо да донесе одлука за исплата на поголема сума на парични средства од предвидените.

Како цели на Програмата за спорт се наведени: збогатување на спортскиот живот,  промовирање на можностите на општина Гостивар да биде домаќин на спортски манифестации од највисок национален ранг, афирмирање на Гостивар како развиен спорстки центар, зголемување на опфатот на млади граѓани кои се бават со спорт и спортско рекреативни активности преку развој на училишниот спорт, создавање услови за настапи во земјата и странство на наши истакнати спортисти и на млади спортски надежи,  развој и поддршка на програмите за спорт и рекреација на лицата со инвалидитет, како и за лицата со пречки во развојот, поголемо учество на жената во спортот, остварување и унапредување на меѓународна спортска соработка.