Владата донесе одлука за кризна состојба во дел од земјава

На денешната седница на Владата по разгледување на информација по однос на записникот од седница на Управувачкиот комитет за координација и управување во системот за управување со кризи, одржана на 26 јуни 2020 година, донесе Одлука за постоење на кризна состојба на дел од територијата на земјава, заради зголемен обем на влез и транзитирање на мигранти.

Постоењето на кризната состојба утврдена со оваа одлука ќе трае 30 дена од денот на нејзиното влегување во сила, односно од 2 јули, а со тоа се активира и Главниот штаб при Центарот за управување со кризи кој ќе биде во постојано заседавање.

„Со оваа одлука Владата го задолжи Главниот штаб при Центарот за управување со кризи да изготви акциски план за превенција и справување со влезот и транзитирањето на мигрантите низ територијата на Република Северна Македонија, како и целосен преглед за расположливи човечки и материјално – технички ресурси и план за координирано дејствување, а органите на државната управа да преземат мерки и активности согласно прописите за управување со кризи.“, се вели во владиното соопштение.

Кризната состојба ќе ги опфати јужната и северната граница на Македонија.