Во Гостивар до сега потврдени 3.624 корона позитивни, активно заразени се 203

Од почетокот на 2021-ва година, епидемиолошката состојба со коронавирусот на подрачјето на Гостивар бележи стабилизација, со тренд на намалувањее на новите случаи, како и на активно болните.

Според последните податоци од Институтот за јавно здравје, моментално активно болни во регион на Гостивар (општини Гостивар, Врапчиште и М.Ростуше) се 203 граѓани, што значи дека за период од месец и половина бројката е преполовена. Паѓа и бројот на пациенти кои имаат потреба од хоспитализација, односно кај кои се јавуваат компликации. Министерството за здравство во вчерашниот извештај информираше дека во ковид одделенијата на гостиварската болница се лекуваат 19 пациенти.

Од почетокот на пандемијата, во гостиварскиот регион со коронавирус се дијагностицирани 3.624 лица. Оздравеле 3.259, додека за 162 заразата имала смртни последици.

Статистиката на Министерството за здравство покажува дека во земјава досега се направени вкупно 456.341 тестирања на ковид -19. Вкупната бројка на дијагностицирани лица од почетокот на пандемијата изнесува 92.693, бројката на оздравени пациенти е 81.681, на починати е 2.855, а бројот на активни случаи изнесува 8.157.