Во Маврово и Ростуше 14 граѓани се во самоизолација, најавена дезинфекција на објекти

На подрачјето на Општина Маврово и Ростуше, вкупно 14 лица се во самоизолација, од кои две претходно биле во двонеделен државен карантин. Во оваа општина изминатите денови беа регистрирани првите два случаи на коронавирус и тоа кај жители на селата Пристојница и Ростуше.

Кризниот штаб за справување со коронавирусот, информираше дека едниот позитивен пациент е дома во самоизолација и е во добра здравствена состојба, без симптоми, додека другиот е на лекување во Инфективната клиника во Скопје.

„Во постојан контакт сме со двајцата наши сограѓани, и за среќа и двајцата се во добра здраствена состојба. Исто така, сме во постојана комуникација со епидемиолозите од Клиниката во Скопје и Општата болница во Гостивар, од каде добиваме информации за нивната здраствена состојба како и совети како да постапуваме за превентивно делување со лицата кои биле во непосреден контакт со инфицираните. Ги замолуваме граѓаните строго да се придржуваат кон препораките дадени од страна на Министерството за Здравство, задолжително да носат заштитни маски, да ги мијат рацете почесто, да избегнуваат одење по гости, да не се собираат во групи, да одржуваат растојание од 2 метри, да избегнуваат патување во другите градови.“, соопштија од Кризниот штаб.