Во Скудриње ќе се отвора детска градинка

Долнореканското село Скудриње е опфатено во Програмата за отворање на нови детски градинки во 2017 година, на Министерството за труд и социјала. Предвидено е установата да профункционира до крајот на септември, а во неа ќе може да се згрижуваат до 25 дечиња од предучилишна возраст. Во Програмата стои дека просторот ќе биде обезбеден од страна на општина Маврово Ростуше, на која и припаѓа селото, додека опремувањето со инвентар и потребните реквизити е обврска на Министерството.

Скудриње е едно од неколкуте села во земјава во кои, до крајот на годината ќе се отвораат градинки. Целта е да се овозможи поголем опфат на деца од руралните средини во претшколските установи. Нова детска градинка во септември ќе проработи и во Врапчиште и тоа со капацитет од осумдесетина деца.