Вода со фекалии и отпад тече низ каналот за наводнување Здуње-Пирок

На магистралниот канал за наводнување Здуње – Пирок му се заканува еколошка катастрофа. Наместо чиста вода, низ него течат фекалии и отпад. На каналот на диво се приклучени одводни фекални системи од индивидуални објекти, а често пати се користи и како депонија каде се фрла се и сешто,алармираат вработените од АД Водостопанство подружница Полог. Тие велат дека тоа е дело на несовесни граѓани и фирми.

Гнасната вода завршува во земјоделските површини во гостиварско, со оглед на тоа дека каналот е наменет за наводнување на околу 3000 хектари земјоделско земјиште.

Секундарна цел на каналот, кој се снабдува со вода од изворот на Вардар, е регулирање на површинските води во случај на поплави. Но, сметот го затнува и најчесто при поголеми поројни дождови, водата се излева во околните ниви.

Од Општина Гостивар, велат дека нивни екипи ќе излезат на терен да ја проверат состојбата и ќе се преземат соодветни мерки.