Водата од градскиот водовод во Гостивар треба почесто да се анализира

Каква е водата што ја пијат жителите на Гостивар од градската водоводна мрежа? На прашањето поставено по повод Светскиот ден на водите, 22-ри март, добивме одговор дека водата е генерално исправна, но за да се гарантира нејзината безбедност, испитувањата треба да се вршат многу почесто отколку сега.

Службите на Центарот за јавно здравје земаат мостри за анализа трипати месечно, што остава простор за сомнеж, дека во меѓувреме може да се случи водата да се загади или замати, а тоа да не биде навреме откриено. Според д-р Берун Мустафа, специјалист во Центарот во Гостивар, водата за пиење треба да подлежи на анализи најмалку шест до девет пати во месецот, за да се имаат попрецизни параметри.

„Оваа година ќе треба да го покачиме бројот на анализи, затоа што вака, не можеме да ја гарантираме безбедноста на водата за пиење за град со толку голем број на жители, како што е Гостивар. Испитувања би требало да се прават два до три пати повеќе“, вели д-р Мустафа.

Во лабараториите во Гостивар се вршат анализи на мостри вода од трите општини во регионот Гостивар, Врапчиште и Маврово Ростуше.

Водоводните системи низ селата не се дезинфицираат редовно, што доведува до бактериолошка загаденост на водата. Во градскиот водовод, во одредени периоди пак се појавува матност, која според лекарите не е на алармантно ниво.

Анализите на гостиварските служби на Центарот за јавно здравје покажале дека  бактериолошка загаденост на водата се јавува во селата Врапчиште, Зубовце, Галате, дел од селото Србиново и дел од мавровскиот регион. На надлежните претпријатија им било наложено да преземат мерки за хлорирање и дезинфекција.