Возењето велосипед ве прави здрави и среќни!

Затоплувањето и поволните временски услови се доволна провокација за оние кои го сакаат возењето со велосипед, да го заменат автомобилот со ова едноставно, но многу корисно превозно средство. Иако, кај нас велосипедите генерално се користат за рекреација, а многу поретко како секојдневна потреба за превезување до работа или училиште, сепак велосипедите не се целосно заборавени. Пролетта е идеално време да го активирате вашиот велосипед, а причини за тоа има многу.

Одредени истражувања извршени во САД покажале дека редовното возење со велосипед, поточно вртењето на педалите, го намалува ризикот од срцеви заболувања дури до 50%. Доколу луѓето го практикуваат ова, годишно во светот би се избегнале 10 илјади инфаркти. Позитивно делува и врз работата на белите дробови.

Возењето велосипед ги зајакнува мускулите, зглобовите стануваат поподвижни, а се подобрува и држењето на телото. Незаменлива активност е за губење на вишокот на килограми, а при тоа да не мора да држите некои ригорозни диети. Велосипедот го чува вашето ментално здравје и го намалува стресот, кој е причина за појава на многу болести и нарушувања во денешницата. При возење велосипед организмот ослободува ендрофин, хормон на среќата.

Освен што е добро за вашето здравје, возењето велосипед е добро и за буџетот. Ако автомобилот го замените со велосипед, ќе си заштедите пари. Плус ќе ги избегнете гужвите и метежот низ улиците, па ќе стигнете до посакуваното место побрзо.

Секако на крај, да не заборавиме дека уште една причина е зачувувањето на животната средина. Велосипедите за разлика од автомобилите не предизвикуваат еколошки штети.

Што чекате? Извадете го велосипедот од подрумот и возете го што повеќе.