За една недела во Гостивар само 27 новозаразени со коронавирус

Во периодот од 3 до 9 мај во земјава направени се 15.781 тест за коронавирус, а регистрирани сe 1.304 нови позитивни случаи, што е 37,2% во однос на претходната недела, стои во неделниот извештај на ИЈЗ. Процентот на позитивност се движи од 2,5% до 12,2%, просечно 7,5%. Најголем дел од регистрираните случаи се од Скопје (482). Подрачјето на Гостивар во овој период е со потврдени 27 нови случаи.

Регистрирани се заболени лица во сите возрасни групи. Најзастапена е возрасната група на лица на возраст над 60 (508). Најмал број е регистриран кај децата од 0-9 (26) и 10-19 години (53). Се забележува намалување на бројот на заболени кај сите возрасни групи, со најголемо процентуално намалување кај лицата до 39 години (41,1%).

По добиени 2 негативни теста за присуство на SARS-CoV-2 или со употреба на новиот алгоритам, со статус „оздравени“ се стекнале 4.502 лица кои биле хоспитализирани или на домашно лекување, со зголемување од 12,2% во споредба со минатата недела.

Пријавени се 105 смртни случаи од 21 град, 37,1% помалку во однос на минатата недела. Во однос на возраста, 91 лице биле над 60 години, 6 лица на возраст од 50-59 години, 5 лица на возраст од 40-49 години, 2 лица на возраст од 30-39 години и едно лице на возраст од 20-29 години.