За отсуство од работа поради антикорона мерките родителите да земат потврда од градинка или училиште

Градинките и училиштата од денеска, па во наредните 14 дена остануваат со затворени врати, како мерка за превенција од ширење на коронавирус. Заедно со оваа, Владата вчера донесе и одлука еден од родителите на децата до 10 години, да бидат ослободени од работните обврски, а отсуството да им биде платено.

За да го оправдаат отсуството треба да земат потврда од градинката или училиштето каде е запишано детето и да ја достават до својот работодавач.

„Се работи за платено отсуство  Не треба да земаат денови од одмор, не треба да земаат боледување, со оваа потврда ќе се регулира отсуството, а Владата преку Министерството за финансии и економските сектори во моментов прави пресметки и проценки за евентуален надоместок на одредени ефекти кои би се јавиле од примената на овие мерки. Ова важи само за децата што посетуваат воспитно образовна институција и токму затоа ќе треба да приложат потврда  од градинка или училиште и врз основа на тоа ќе може да ги користат овие услови“, изјави во емисија на ТВ24 вчеравечер, министерот за информатичко општество и администрација Дамјан Манчевски.