Заев распали оган со „историскиот“ кров на ОУ „Гоце Делчев“ во Гостивар

На трибината, којашто СДСМ ја организираше во Гостивар изминатиот викенд,  претседателот на партијата Зоран Заев зборувајќи за проекти коишто државната власт ги реализирала на подрачјето, го спомена кровот на ОУ „Гоце Делчев“ упатувајќи благодарност до Фатон Асани, за како што рече, дадениот придонес за реконструкцијата на покривот.

„Работевме и во Гостивар. Не е само гасоводот што го носиме во Гостивар, и театарот што го отворивме во Гостивар, тука се и новите центри за ран детски развој во Равен и во Форино, истовремено целосно го реконструираме патот од Гостивар кон Кичево со пет моста, коишто се реконструираат. Да му се заблагодарам на Фатон Асани, кој даде прилог да се реконструира после децении, кровот на основното училиште „Гоце Делчев“ со проект на УНДП, со помош на Швајцарската амбасада, преку Швајцарската агенција за развој.“, рече Заев.

Општината преку соопштение реагираше на ваквата изјава. „Реконструкцијата на покривот на ООУ „Гоце Делчев“ е резултат на заложбите на Општина Гостивар и подготвеноста на меѓународната заедница да помогне таму кадешто владата не успева да ги исполни своите обврски, а сето тоа во интерес на граѓаните. Како што се изрази самиот градоначалник Арбен Таравари: „Oпштопознато е дека покривот на ООУ „Гоце Делчев“ го финансира УНДП (преку проект на Швајцарската амбасада) и Општина Гостивар, без никаква помош од Владата на РСМ“. Дури и да беше точно тоа што го изјави Заев на трибината во Гостивар, сепак е срамно за премиерот да му се заблагодари на некој поединец, кој наводно успеал да обезбеди донација од меѓународни организации за една од основните задачи и надлежности  на Владата, за обезбедување на нормални услови за живот на учениците за време на нивниот престој во јавните училишта“, се вели во општинската реакција.

Инаку, Фатон Асани е директор на Агенцијата за управување со одземен имот.