Завршна изложба на делата од ликовната колонија „Гостивар 2023“

Со заедничка изложба вчеравечер во гостиварскиот Центар за култура АСНОМ се заокружи годинешното издание на Меѓународната ликовна колонија „Гостивар 2023“. Четириесетина уметници од земјава и Албанија, Турција, Србија, Косово, Хрватска, Црна Гора, Франција, Англија, Америка изминатите неколку дена ги создаваа своите дела во рамки на колонијата, разменуваа креативна енергија и искуства и посетија препознатливи места и природни убавини во гостиварскиот регион. Колонијата по осумнаесетти пат ја организира Здружението на ликовни уметници Драудакум.

„Чест е да се биде домаќин на квалитетни уметници од сите страни на светот, им благодарам за учеството и им посакувам натамошни успеси во творењето. Благодарност и до сите оние кои го поддржуваат одржувањето на колонијата“, кажа меѓу другото на отворањето на изложбата, претседателот на Здружението, Арјан Руфати.

На отворањето свои куси обраќања имаа и претседателот на гостиварскиот Совет Валбон Лимани, Државниот секретар во министерството за култура Валмир Азири, директорот на Центарот за култура Ход Мифтари и професорот Решат Амети.

На сите уметници учесници во колонијата им беа доделени благодарници.

Меѓународната ликовна колонија „Гостивар 2023“ е поддржана од Министерството за култура, Општина Гостивар и Центарот за култура.