Зградата со социјални станови во Гостивар е готова, се чека на огласот

Седумдесет станови за социјално ранливи категории на граѓани во Гостивар, чекаат на распределување. Зградата покрај Кејот на Вардар, близу големиот мост е целосно готова, а извршен е и технички прием. Останува надлежните Министерства да го подготват огласот според новата методологија, согласно новиот закон за социјална заштита, којшто беше донесен летово.

„Веќе е извршен технички прием на зградата. Ќе се формира комисија од Министерството за транспорт и врски и Министерството за труд и социјална политика, за да се изработи огласот согласно новата методологија, и на крај да бидат распределени становите. Се надеваме дека тоа ќе се случи во најбрз временски рок. Ние ќе вложиме напор и ќе направиме се`, тоа да биде до крајот на оваа година.“, изјави при денешната посета на гостиварскиот регион, министерот за транспорт и врски, Горан Сугарески.

Изградбата на социјалните станови во Гостивар започна пред околу четири години. Проектот е вреден околу 85 милиони денари.

Во зградата со две ламели, има вкупно 70 станови наменети за семејства од ранливи категории.