Зенки со коментар: Министерството изврши атентат врз Центарот за култура во Гостивар

Директорот на Центарот за култура АСНОМ во Гостивар, Луан Зенки изразува големо незадоволство од годишната Програма на Министерството за култура и вели дека за установата која ја раководи се одобрени многу мал број проекти и ниски износи за нивна реализација. Потенцира дека годинава ќе нема доволно пари ни за одржување на објектот, ниту за културни настани и дека Министерството одбило значајни проекти и манифестации за Гостивар.

„Прво добивавме пофалби дека сме многу успешна установа, дека промовираме културни вредности и слично и на крај од цело буре добивме само една лажица. Ова е катастрофа. Ние сме тотално демотивирани. Ако Гостивар нема ликовни уметници, светски познати кои заслужуваат целосна поддршка, тогаш кој има. Сумите што ги одобриле за изложби се смешни. Не може нашата институција со целата инфраструктура со која располага, да не е поддржана со ниту една драмска претстава. Лани скоро секој месец правевме по една претстава, а сега ништо нема. Не помина ниту поетскиот фестивал Литературни искри на кој толку многу сме работеле и се правеше за 24 мај. Зарем на комисијата и на Министерството не им е важна манифестација по повод Денот на словенските просветители“, вели директорот.

Министерството прифатило 15-тина проекти на гостиварскиот Центар за култура и речиси за сите одобрило помалку пари отколку што било побарано. Така, за манифестација по повод Велигден, Центарот барал 180 илјади денари, а Министерството одобрило 60. За Денот на Албанската азбука побарани се 150, а добиени 10 илјади денари. За одбележување на 2 Август, Центарот барал 550 илјади денари, а добил 150. Самостојните изложби ќе треба да се реализираат со буџети од 20 до 30 илјади денари, а прифатени се и три колективни изложувања во Гостивар.

„Невладини организации за кои никој не слушнал и кои не биле активни со години, добиваат по 10 илјади евра, а ние како институција со екипа, со адреса, со сала, со сите можности, добиваме минимални суми. Не знам тие комисии и Министерството што правеле. Очекувавме многу поголема поддршка. Ова е директен атентат врз културата и врз Центарот во Гостивар“, коментира Зенки и најавува дека ќе поднесат приговори до Министерството.