151 казна за пребрзо возење на патот Гостивар-Тетово-Скопје

Полициски службеници на СВР Тетово денеска (8 декември) од 8 до 14 часот, спроведоа акциска контрола за брзина, во која било откриено и санкционирано 151 возило (Тетово-124 и Гостивар-27), кое ја пречекорило максимално дозволената брзина надвор од населено место, претежно на автопатот Гостивар-Тетово-Скопје.

Седум од пречекорувањата биле за повеќе од 70 километри на час, а 66 пречекорувања за 50 до 70 километри на час. При контролата, исто така, санкционирани се и 47 пречекорувања на брзината (Тетово-29 и Гостивар-18) во населено место, а санкционирани се и 10 други видови сообраќајни прекршоци.

„На сите прекршители изготвени им се соодветни поднесоци и ќе се соочат со законски предвидените парични глоби. На пребрзите ќе им бидат времено одземени и возачките дозволи од 3 до 12 месеци.СВР Тетово уште еднаш апелира до возачите да ја прилагодат брзината според условите на патот и да придонесат за сопствената и безбедноста на другите учесници во сообраќајот во поширокиот Полошки регион.“, извести портпаролот на СВР Тетово Марјан Јосифоски.