2МФЛ: ФК Гостивар загуби од Скопје – Вардар Форино загуби од Охрид

Викендов се одигра 15. коло од Втората македонска фудбалска лига, гостиварските претставници во ова натпрварување загубија значајни бодови во трката за врвот на табелата, односно борбата за опстанок во лигата.

ФК Гостивар гостуваше во Автокоманда кај првопласираната екипа на ФК Скопје. Избраниците на Љупчо Марковски – Калц ја оправдаа фаворитската улога совладувајќи ја екипата на Гостивар со резултат 4-0 и обезбедувајќи ја титулата есенски првак во Втората МФЛ – Запад. Со овој пораз ФК Гостивар ги намали шансите за првото место кое носи директен пласман во Првата лига. Гостиварци со 29 бодови се наоѓаат на 3. позиција на табелата со 2 бодови помалку од второпласираната екипа на Велешта. Во следното, воедно и последно коло годинава, ФК Гостивар ќе ја пречека екипата на Велазерими 77 од Кичево.

Вардар од Форино на домашен терен ја пречека екипата на Охрид Лихнидос, форинци го загубија натпреварот со резултат 0-1, со што се ставија во неповолна ситуација во борбата за опстанок. ФК Вардар Форино сега е над опасната зона, но на само 3 бодови предност пред екипата на Лабуништа/Тетекс, на која и гостуваат во последниот натпревар од есенскиот дел, следниот викенд.