55% од анкетираните родители дале „Одличен 5“ за онлајн наставата-истражување на УНИЦЕФ

Истражување на УНИЦЕФ покажало  дека перцепцијата на родителите за онлјан наставата е дека таа е значително подобрена оваа учебна година споредено со лани. Во анкетата биле опфатени 1.793 родители. 55% од нив наставата на далечина ја оцениле со „петка“ или одлично, а 25% со „четворка“ или многу добро.

„Според податоците од истражувањето со родителите може да се заклучи дека има голем напредок во однос на организацијата на наставата и квалитетот на истата, споредено со лани. Оваа година дури 45% од анкетираните родители рекле дека не се соочиле со поголеми потешкотии во однос на организацијата на онлајн учењето на своите деца, додека лани вака одговориле само 19%. Покрај ова, се забележуваат позитивни трендови во однос на сите прашања поврзани со наставата, па така само 14% од нив рекле дека „наставниците им даваат преобемни задачи на учениците“ во споредба со лани кога вака одговориле 29%.“, соопшти Министерството за образование.

Што се однесува до учениците, на прашањето Дали во твоето училиште наставата на далечина се одвиваше според распоред, 100% од нив одговориле потврдно, за разлика од лани кога тој процент бил 22%.

Наодите од истражувањето беа презентирани денес во Скопје, на настан на кој присуствуваа министерката за образование и наука Мила Царовска, Патриција ди Џовани, претставничка на УНИЦЕФ, Рејчел Галовеј, Амбасадорка на Обединетото Кралство во Северна Македонија, Зекирија Хасипи, директор на Бирото за развој на образованието и Тања Иванова, Претседателка на Реактор – Истражување во акција. Истражувањето било реализирано во две фази и споредува податоци од двете учебни години во периодот март 2020 – декември 2020 година.