67 години од мавровската трагедија во која згаснаа 52 животи

Се навршуваат 67 години од трагичниот настан кога во лавини што го зафатиле мавровскиот крај, животот го загубиле 52 лица – градители на хидроенергетскиот систем Маврово, граничари и месно население.

Ноќта на 11 февруари, 1956 година, по долината на Радика (во околината на селата Рибница, Торбешки мост и Стрезимир) неколку снежни лавини се урнале врз куќи, бараки на градежници и караули при што биле затрупани стотина луѓе. Спасувачките екипи успеале да извлечат само половина од нив. Февруарската снежна трагедија е една од најголемите предизвикани од временска непогода на нашето подрачје.

Споменикот на градителите близу браната е подигнат во 1970 година, а ја симболизира нивната храброст и пожртвуваност. На спомен плоча пак се врежани имињата на сите загинати во снежните лавини.

Годишнината со пригоден собир и положување на цвеќе на споменикот на градителите во Маврово ќе биде одбележана во понеделник.