Снег за прв пат во новата година во Гостивар

Во Гостивар утрово има врнежи од снег со слаб интензитет, први во оваа година. На повисоките места пак има снежна покривка, која според Управата за хидрометеоролошки работи изнесува: 37 сантиметри на Попова Шапка, 15 Лазарополе, 12 Пожаране, 7 Маврови Анови и 4 сантиметри во Крушево.

Утрово најстудено било на Попова Шапка каде се измерени -5 степени Целзиусови, Лазарополе со -4 и Берово со измерени -3 степени. Најтопло било во Скопје-Зајчев Рид, Скопје-Петровец, Штип, Гевгелија, Демир Капија, со измерени 3 степени, и Дојран со измерени 4 степени Целзиусови.

Автомото сојузот на Македонија информира дека од 06:35 часот утрово е воведена забрана за движење на тешки товарни возила на планинскиот премин Пресека. ОД АМСМ исто така информираат дека од 07:50 часот е укината забраната за тешки товарни возила на планинскиот премин Стража.