Производителите на леб од Гостивар против замрзнување на цената на лебот, ако се оствари ќе прекинат со работа

„Производителите на леб на територијата на Општина Гостивар донесоа едногласна одлука дека не се согласуваат со мерката за замрзнување на цената на лебот и истата од повеќе објективни причини не може да се спроведе. Доколку се донесе таква одлука и објави во службен весник, повеќе од 20 производители на леб од Гостивар и гостиварско одлучни сме истиот ден да го прекинеме производството на леб и лебни производи“, се вели со соопштението на производителите на леб од Гостивар кое го испратија до редакцијата на Gostivarpress.mk.

Пекарската индустрија низ целата земјава се закани дека ќе престане со производството на леб доколку стапи во сила мерката за замрзнување на неговата цена, која викендов ја најави министерот за економија Крешник Бектеши, за која рече дека нема да биде повисока од 33 денари за белиот и полубелиот леб.

Владата денес треба да ја донесе одлуката за замрзнување на цената на лебот, која ќе важи само за белиот и полубелиот леб. Се очекува да се знае и дали на прехранбените компании ќе им се укине поевтината струја од среда или ќе ја користат уште цел месец. Ваквиот предлог следува откако министерството за економија утврди дека 70% од фирмите што користат субвенционирана струја, не ги намалиле цените на основните продукти.