Казнети пешаци во Гостивар – ем ќе платат, ем ќе одат на часови за сообраќајна култура

 Во текот на вчерашниот ден сообраќајната полиција во Гостивар спровела акциски контроли во чие средиште биле пешаците. Се утврдувало колку овие учесници во сообраќајот ги почитуваат сообраќајните знаци, правила и прописи.

Како што е наведено во полициското известување, во акцијата биле откриени вкупно осумнаесет прекршоци. Сите се однесувале на преминување на улица надвор од пешачки премин. Пешаците-прекршители се соочуваат со казни од 20 до 50 евра, зависно од видот на прекршокот, а ќе бидат повикани и на часови, односно таканаречена сообраќајна поука.

„Вакви контролни активности планирани се и во наредниот период, дотолку повеќе што и годинава на тетовско-гостиварското подрачје значителен е бројот на сообраќајните несреќи, во кои непосредни учесници биле пешаци, пред се поради нивно невнимателно однесување, неправилно движење или недавање предност од возачите“, соопштуваат од Секторот за внатрешни работи.