Детското катче во гостиварскиот парк пропаѓа

Преполовени лулашки, искршени лизгалки, расфрлани делови од други реквизити, уништена заштитна ограда. Сликата која ги затекнува гостиварци кај детското катче во градскиот парк, воопшто не е пријатна. Игралиштето, кое важи за омилено свратилиште на родителите со помали деца во топлиот период од годината, пропаѓа. Од убав, уреден и безбеден простор за забава на дечињата, катчето полека се претвора во запуштено место.

Меѓу реквизитите поставени за забава и рекреација, има се помалку такви кои може да се користат. Доколку не се преземат мерки за санација и обнова и не престане вандализамот, од ова детско катче наскоро нема да остане ништо.

Несовесни граѓани често уништуваат урбана опрема по парковите и на други јавни површини низ Гостивар. Од вандали страдаат клупи, канделабри, корпи за отпад, јавни чешми и слично.

Детското игралиште во паркот кое е пред распаѓање, Гостивар го доби како донација од Турција во вредност од скоро 40 илјади евра во 2014 година. Претходно на истата локација имаше помало катче за деца, кое исто така заврши уништено.