Општината со прес за злоупотреби – ДУИ со реакција за политички реваншизам врз административци

Општинската власт на Гостивар и овој четврток со нов прес ја продолжи кампањата „Вистината за ДУИ“. Портпаролот Јасин Демири изнесе ревизиски извештаи со обвинувања за злоупотреби со снабдување со гориво за службените возила на општината и трошоци без покритие на ЈП “Хигиена“ – Чегране, во времето на претходното раководство.

„За периодот 2014-2017 година, внатрешната ревизија утврди дека зa возила во сопственост на Општина Гостивар,  потрошени се 5.089.907 денари. Ако анализираме кои возила со какво гориво се снабдувале, сигурно ќе се зачудат и самите конструктори. Возила кои трошат бензин, се снабдувале со дизел, додека оние кои трошат дизел гориво, се снабдувале со бензин. Ова, се разбира, е измама и можеме да претпоставиме дека со пари на граѓаните се снабдувале партиски послушници и партиски војници. Внатрешната ревизија покажува дека во ист ден, општинските службени возила се полнеле по три пати“, рече Демири.

Во однос на ЈП„Хигина“ – Чегране портпаролот изјави дека ревизијата покажала неосновани и сомнителни трошоци за надоместоци за прекувремена работа, патувања во  странство и друго.

Огранокот на ДУИ пак во Гостивар со соопштение реагираше на нови случаи на преместување на административци од општинската зграда во објектот на ЈП „Комуналец“ . „На 14 февруари, по наредба на градоначалникот преместени се нови тројца вработени. Со тоа вкупната бројка на административци кои се „протерани“ во Комуналец од политички мотиви, стигна до 20. И сето тоа се случува во време кога администрацијата се полни со политички војници. Целта на ова е Таравари и неговите соработници да имаат одврзани раце, да прават што сакаат далеку од очите на јавноста.“, наведуваат од ДУИ.