Буџетот за 2018-та година на општина Гостивар на дневен ред во Советот

Предлог буџетот на општина Гостивар конечно ќе се најде пред советниците. За понеделник (5 март) закажана е седница на гостиварскиот Совет, на која една од точките на дневен ред е и предлог буџетот за 2018-та година.

Поради политички судири меѓу мнозинството во Советот предводено од ДУИ и СДСМ и локалната власт на Арбен Таравари, Гостивар до сега остана без најважниот документ за функционирање, буџетот. Кон крајот на јануари се донесе одлука за времено финансирање на општината која значи пари преку Министерството за финансии за основни потреби, во висина од третина од буџетот за овој период лани.

На седницата во понеделник се очекува широка дискусија од двете страни, дополнувања и предлози, а дали буџетот ќе добие зелено светло, останува да се види.

Предложениот буџет од страна на градоначалникот и Секторот за финансии е проектиран на околу 16,8 милиони евра.