Нова несреќа: Возило излетало од патот Дебар – Маврови Анови, повредени се две лица

Регистрирана е нова сообраќајна несреќа на патот Дебар-Маврови Анови, утрово. Според информациите од портпаролот на СВР Тетово, Марјан Јосифоски, автомобил „сеат толедо“, што го управувал 30 годишниот Б.К од Дебар, со дебарска регистрација изгубило контрола и излетало од коловозот. Од излетувањето биле повредени двајцата сопатници во возилото. 58-годишниот Ш.М. од Дебар се здобил со тешки телесни повреди и бил задржан на лекување во болница, додека 40-годишниот У.Ф. исто така од Дебар, бил полесно повреден и по укажана лекарска помош, пуштен дома.

Полицијата извршила увид, материјалната штета се проценува на 100 илјади денари, додека првично причина за несреќата е брзото возење.

Инаку, според полициските податоци за синоќешната несреќа на патот Маврови Анови-Дебар, за која информиравме, повреденото лице е 40-годишен гостиварец Б.Ј., кој по прегледи на Скопските клиники бил вратен на лекување во болницата во Гостивар. Во оваа несреќа, материјалната штета се проценува на 120 илјади денари, а првично како причина се наведува недржење страна.