Министерот Бектеши во Гостивар: Компаниите да користат субвенции од Планот за економски раст

„Ги охрабрувам сите компании во Република Македонија да покренуваат иницијативи, да инвестираат дополнително и да ги користат мерките од Планот за економски раст. Со тоа ќе го зголемиме извозот и ќе го намалиме бројот на невработени.“, порача денес од Гостивар, министерот за економија Крешник Бектеши.

Министерот беше во посета на Фабриката за производство на душеци, Алмеро која ќе користи средства од државните мерки за проширување на капацитетот. „Добро е што компаниите препознаваат дека ние како Влада, преку Планот за економски раст градиме стабилни политики и направивме законско решение за да ги поддржиме сите фирми кои ќе почнат нов инвестициски циклус. Позитивен пример за тоа е фабриката Алмеро“, изјави Бектеши.

Менаџерот на компанијата, Адем Агаи му се заблагодари на министерот за посетата и рече дека поддршката за дополнители инвестиции е добредојдена. „Со постојани инвестирање и напорна работа, се постигнуваат успеси, но поддршката е неопходна. Ние почнавме во 2003-та година со 8 вработени, за денес да стигнеме до бројка од 43 работници“, рече менаџерот.

За субвенции од Планот за економски раст може да аплицираат компании кои прават дополнителни инвестиции и го зголемуваат бројот на вработени, такви кои ја зголемуваат својата конкурентност на пазарот и мали и средни претпријатија.