ДУИ контра назначувањето на новиот директор на Конзерваторски центар во Гостивар

По назначувањето на Илбер Зулфиќари за нов директор на Конзерваторскиот центар во Гостивар, од ДУИ излегоа со реакција во која тврдат дека тој не ги исполнувал условите во конкурсот и дека министерот за култура при назначувањето го прекршил законот.

„Министерот за култура Асаф Адеми, политички мотивиран назначи нов директор, кој не ги исполнува условите наведени во конкурсот за избор на директори на национални установи од културата. Го поттикнуваме претходниот директор на Конзерваторскиот центар во Гостивар да ги искористи законските процедури за поднесување на жалба на нелегалната одлука потпишана од страна на министерот за култура“, се вели во соопштението од гостиварскиот огранок на ДУИ.

Од Министерството за култура ги отфрлија ваквите наводи нагласувајќи дека изборот на новиот директор бил направен законски, а избраниот кандидат ги исполнувал сите услови.