Од денес се реактивира зонскиот паркинг во Гостивар

Како што најавивме минатата недела, од денес повторно во функција е ставен зонскиот паркинг во Гостивар. Цените за сега, остануваат непроменети. Паркирањето чини 25 денари од час за централното градско подрачје и 10 денари од час за периферните улици.

Плаќањето на зонскиот паркинг се врши на три начини: со СМС пораки, билети кои се продаваат на одредени места или со месечни паркинг карти.

Од Јавното претпријатие за паркинзи и зеленило рекоа дека со оглед на повеќемесечниот прекин на зонскиот паркинг, во првичниот период од повторното воведување ќе имаат толеранција, но упатија апел до возачите да ги почитуваат правилата и да плаќаат при користење на паркинг местата. „Немаме цел да казнуваме, туку да ја подигнеме сообраќајната свеста кај граѓаните и да ги средиме гужвите кои се создаваат“, велат од ЈП.

Паркирањето ќе се наплатува од понеделник до сабота, и тоа од понеделник до петок од 7 до 21 часот, а во сабота од 7 до 14 часот. Во недела и државни празници, паркирањето нема да се наплатува.

За јавните превозници, такси возилата и комбињата останува досегашната практика, и тие нема да плаќаат за паркинг, односно го покриваат трошокот со добивање на лиценца за вршење јавен превоз .