Голем интерес за вакцинирање против грип во Гостивар

Имунизацијата на населението од грип започна во понеделникот, а епидемиолошкото одделение во Гостивар е преполно со граѓани кои сакаат да примаат вакцина. Оваа сезона за Гостивар набавени се вкупно 2.200 дози, од кои 1.200 се за пензионери кои ги исполнуваат условите за бесплатно вакцинирање. Останатите заинтересирани треба да ја платат по цена од 650 денари.

„Пензионери над 65 години со просечна и потпросечна пензија, со чек од својата пензија треба да се обратат кај матичниот лекар, кој пак преку „Мој термин“ ќе им закаже термин за вакцинација.  Пензионерите над 65 години кои не земаат пензија, ќе можат да се вакцинираат бесплатно со потврда од ПИОМ“, објасни епидемиологот прим. д-р Војислав Огњаноски.

Лекарите ја препорачуваат вакцината против грип, особено на ризичните групи на граѓани: постари лица, хронично болни, здравствени работници и други лица во здравствен ризик.

Вакцинацијата се спроведува во Епидемиолошкото одделение во Гостивар.