Желба или потреба? Околу 45% од трудниците во Гостивар раѓаат со царски рез

Гостиварки се почесто се породуваат со операција-царски рез, отколку по природен пат. Според податоците на гинеколошко-акушерското одделение во болницата во Гостивар, минатата година од вкупно 674 раѓања, околу 300 или 45% биле со царски рез. Лекарите оценуваат дека тоа е прилично висок процент, но нагласуваат дека ваков тренд постои и во останатите градови во Македонија, а и глобално расте бројот на жени кои бебињата ги донесуваат на свет со царски рез.

„Бројката е малку висока за една провинцијална болница, но тоа е веќе светски тренд. Околу причината зошто жените преферираат царски рез, може да се каже дека некогаш нема соработка и е лоша комуникацијата на релација доктор-пациентка, или пак трудницата претрпела некој стрес за време на бременоста, па има страв од породување по природен пат и бара царски рез.“ , вели раководителот на гинеколошко-акушерското одделение д-р Агим Јакупи.

Стручњаците предупредуваат дека царскиот рез е сериозна акушерска операција, која  има и свои ризици. Затоа, трудниците не треба да се водат по своите желби и стравови, туку по реалните потреби. „Жените не треба да го гледаат царскиот рез како привилегија при раѓањето, ниту пак да сметаат дека природното породување е мачење. Мора да соработуваат со докторот и да ги слушаат советите“, велат лекарите.

Царскиот рез е најчестата хируршка интервенција во болничките установи во Македонија.