Повторно пишман: Променет Законот за спречување перење пари и финансирање тероризам, дозволено плаќање во кеш до 3.000 евра

Министерството за финансии, согласно Законот за спречување перење пари и финансирање тероризам заради намалување на сивата економија најпрво го намали прагот за плаќање во готово од 15.000 на 2.000 евра. На први јануари 2019 тој праг се намали на 1.000 евра, а од јуни на 500 евра.

Една година подоцна, следи корекција на долго најавуваниот закон, за кој своевремено беше потенцирано дека една од причините за позитивниот извештај на Европската комисија во областа на борбата со сивата економија, е токму примената на овој Закон.

Владата на последната 174 седница по предлог на неколку пратеници, по скратена постапка го промени овој закон. Со најновите измени на Законот за спречување перење пари и финансирање тероризам, прагот за плаќање во готовина зголемен е од досегашните 500 на 3.000 евра.