Гостивар со најмногу заболени од грип, над 200 граѓани го „фатиле“ вирусот

Гостиварскиот регион е со најголем број на заболени од грип во земјава, овој период. Според податоците од Институтот за јавно здравје, вирусот е регистриран кај 219 граѓани. По Гостивар, следуваат Скопје со 173 и Струмица со 171 заболен. Вкупно во земјава има 1.035 болни.

За епидемиолозите овие показатели не се загрижувачки и оценуваат дека вирусот има ниска активност. Сепак, препорачуваат граѓаните да внимаваат на своето здравје. Советуваат да се козумираат што повеќе топли напитоци, витамни, пред се` Ц витамин, да се јаде овошје и зеленчук, да се избегнуваат места со гужви, затоа што во такви групи голем е ризикот да се пренесе болеста, која во близок контакт лесно се пренесува од човек на човек.

Лекарите ја сметаат вакцината за најефикасна мерка против грипот. Во епидемиолошкото одделение во Гостивар сезонава се вакцинирале над 1.600 граѓани. Комерцијални вакцини коишто се плаќаат по 650 денари, се` уште има, додека бесплатните кои беа наменети за одредени групи на граѓани се потрошени.

Препознатливи симптоми на грипот се: силни болки во мускулите и зглобовите, треска, висока телесна температура, сува кашлица, болка во очите и главоболка.