Болни, немоќни, лица во изолација и заболени од ковид за гласање се пријавуваат до полноќ

Вечерва на полноќ истекува рокот за пријавување за гласање на Парламентарните избори на болни, изнемоштени, лица во изолација и заболени со ковид. Пријавувањето се врши преку полномошник во Општинските изборни комисии, а за корона позитивните и изолираните има можност и онлајн преку апликацијата на следниот ЛИНК

Гласањето на болните од ковид и оние во изолација ќе се спроведе на 13 јули (понеделник), додека наредниот ден на 14 јули (вторник) ќе гласаат болните, немоќните, хронично болните и лицата во затворите и во домашен притвор.

За гласањето кое ќе се спроведува на 13 и 14 јули 2020 година, имајќи предвид дека се работни денови, Државната изборна комисија препорача сите членови на избирачките одбори кои ќе го спроведуваат гласањето овие денови, да бидат ослободени од работа, без разлика дали истите се во работен однос во државна институција или приватен сектор.

Главниот ден на гласање на изборите е 15 јули, кога гласачките места ќе бидат отворени во 7 часот наутро се до 21 часот. Предвидено е изборниот процес да се одвива согласно задолжителните препораки и упатства усвоени од Државната изборна комисија.